Kya India ke banking sector pe China ki Nazar hai?

 

India ke Banking Sector pe China ki nazar? TikTok ban ka badla?


June 15 me India ke ladakh sector ke paas Galwan valley me kuch clashes ki khabar aayi this, jiske baad se India aur China ke rishton me kuch aisi bitterness ayi hai ke dono deshon ke taraf se kayi statements diye gaye hai, dono desh ne kuch aise kadam bhi uthaye hain jo ek doosre ke bilateral rishton ko bigad ne ka kaam kiya. India me ek aisa muhim chala jisme kaha gaya ki chinese goods ko band kar dena chahiye aur isike beech me khabar jab ye aati hai ke China dheere dheere India ke banking sector me ghusne ki koshish kar raha hai aur apni jagah desh ke do bade private sector bank me bana li hai to fir sabse important sawaal y hota hai ki kya ye China ka India ke khilaaf koi economic warfare ka start hai? Kya isse humari economy ko andar se koi khatra hai? Ye hi saare sawaal aur analysis hum aaj karenge, to bane rahiye humare saath, aur poora post ko end tak padhiye. blog ko subscribe kijiye, post ko like aur share kijiye aur comment box me apni soch hume bataiye.

 

 

HDFC aur ICICI bank me Bank of China ka investment

HDFC bank ne abhi recently ek bahut bada khulasa ye kiya tha (March 2020 me) ke unke total FDIs me se People’s Bank of CHina, jo China ka sarkari bank hai, uska investment 1% cross kar chuka hai. Aap sabko pata hai ki HDFC bank India ka number 1 private bank hai aur desh ka garv kehlaya jaata hai. Is Desh ke garv waale bank me jab Bank of CHina ka stake 1% cross kiya tab sawaal ye aaya ke kya Bharat Sarkar ko isme kuch karna chahiye? Kya koi step lena zaroori hai? Isi sawaal ko answer karte hue India ke government ne banks me FDI related regulations me kuch changes laye April me.

 

Sabse pehle ye samajh lijiye ke ye maamla kya hai, aur iska implications kya ho sakte hain. October 2016 me Indian Government ne Banks me 100% FDI ka announcement kiya tha. Iska matlab ye tha ki India ke private banks mein koi bhi foreign player full ownership tak pahuch sakta tha. Lekin jaise hi HDFC bank me 1% shares cross hua PBOC ka, uske baad sarkar ko ye samajh aaya ke Corona pandemic ke dauran jab banks bure halaat se guzar rahe hain, tab is rule ka fayda uthake koi bhi foreign power jo India ke against hai, wo India ke banking instituion ta hostile takeover kar sakta hai aur ye desh ke liye bahut zyada chinta ki baat hogi. Isi liye, Indian FInance Minister Nirmala Sitharaman ji ne, April me ye annoucement kiya ki jis jis desh ke saath India ke land border shared hai jaise Pakistan, China, BHutan, Myanmar, Bangladesh etc, un desho se koi bhi FDI jo Indian financial institutions ki taraf hogi, unke liye government approvals ki zaroorat hogi. Isko india ki FDI policy, jo Foreign Exchange Management Act (FEMA 1999) ke andar aata hai, usme ek amendment ki tarah laaya gaya. Lekin isme ye clear nahi ho paya ki koi bhi foreign company jo India ke saath border share karti hai, jaise China, wo agar koi bhi Indian bank me portfolio maintain karna chahti hai, to kya uske liye bhi government ka permission chahiye hoga?

 

Isi sawaal ko aur zyada hawa mila jab news aisi aayi ke ICICI bank, India ka second largest private sector bank me bhi PBOC ka stake 0.006% ho gaya hai aur ye pichle mahine ICICI bank ke pichle mahine kiye gaye Qualified Institutional Placement ya QIP ke dauran hua hai jisme PBOC ne 15 Crore INR lagaye hain ICICI bank me. Ye number koi bahut zyada nahi hai, lekin kya isse ye pata chalta hai ki China ki Nazar India ke financial Institutions ki taraf hai? Isse Pehle, HDFC bank ke taraf se ek official announcement ye aaya tha ki PBOC pehle se hi bank ka shareolder tha, 1%stake cross karne ke wajh se unhone ye announcement kiya hai.

 

Kya India me TikTok ban aur poore worldme chinese app ban ke wajah se CHina itna desperate ho chuka hai ki wo alag alag tareeko se apne neighbors ke financial policies me ghusne ki aur usko influence karneki koshish kar raha hai? CHina ne already Pakistan ke economy ko ane mutthi me kar rakhha hai aur Pakistan ke saare major development projects me china main funding partner hai. India ko dhyan rakhna padega ki China aise India ke institutions me bhi na ghoos jaye, Corona virus ka start bhi CHina me hi hua tha lekin CHina ka economy uske baad firse chalu ho huka hai, wahi pe duniya ki Economy aur India ki economy kaafi bure daur se guzar rahi hai aur aisa lagta hai ki India ki economy is quarter me 16% shrink karegi. Is haalaat me desh ki institutions ko protect karna zaroori hai, taaki india ki economy pakistan ke jagah na pahuch jaye. Baaki deshbhakto ko mera kehna hai ki is economical situation se kaise age badha jaa sakta hai, kaise Atmanirbhar bharat ka sapna poora kiya ja sakta hai, usse related koi bhi suggestion ho to comment box me daaliye zaroor.

Post a Comment

0 Comments